拆解IQ題

一班好友約咗出去玩，甲乙並排行最尾 … …

甲行行下無厘那更企咗係度問：「究竟雞先定蛋先？ 」

乙：「吓？！ 乜鬼嘢雞先定蛋先呀？ 梗係行先啦 ～ D人行晒嘞！ 」

乙催促：「一係 — 你一路行，一路諗啦 ～ 」

甲繼續企定定好似無意思喐咁款！ 乙見到佢個勢好似諗唔通唔肯走咁，搲晒頭，心諗：「撞鬼嘞！ 咁攪法，佢可以企到天黑㗎噃，點攪呀？！ 今日出離係離玩㗎嘛！  餼！！ 」

乙：「好嘞好嘞，一齊諗嘞，咁 — 可能可以快D諗到吖 ～ 」

乙分析：「嗱 — 蛋吖，即係卵，蛋係卵離㗎嘛！ 噫 ～ 點解條問題唔係問魚先定卵先嘅，其實係一樣㗎喎，呢個問法會唔會易D答到呢？！ 但係，卵係繁殖系統裡面嘅東西，呢家野其實係可以好鬼複雜㗎喎！ 呢個你係知㗎可？！ 」

乙轉而認真：「嗱，我認為呀吓 ～ 生命最初始應該係由一個最簡單嘅單細胞而離（一個在巨大偶然之下產生出離嘅超級神奇），而佢 — 在進行各種分裂分化分工後形成各器官各組成部分，長久嘅進化令生物生命體為適應生活生命各事而形成各異的模樣，它們跟隨著自然，一直發展至今天我們所見的 … …  」

乙：「嗱，講開又講呀吓，之不過又真係幾鬼得意㗎喎，雞係雀 — 鳥類離㗎嘛，又願意俾人養咗過千年，企鵝都係雀離㗎嘛，郤又走咗返咗去海洋嘅生境，過返D魚一般嘅生活，點解佢地會揀倒轉頭唔跟演化序，呢樣野又真係要問過佢地自已先至知 ～ 」

生物學告訴我們：-

單細胞生物（i.e. 藻類、變形蟲）—（分裂發生）—＞ 多細胞生物  —（複合與分化）—＞  生物生命體於海洋生態中各自適應以至演化 … …

然後，好一些個體內發展比較成熟結構比較複雜的生物選擇離開海洋走到陸上去，以其整體結構複雜程度被劃分出來（主要從觀測其腦結構、心結構與骨骼架構來進行進一步的辨識），概括得出：-

魚類 —（出水）—＞  兩棲類 —（安陸）—＞  爬蟲類 —（演化）—＞  哺乳類 —（飛天）—＞  鳥類

再，各自各對其周邊的生境進行進一步的自我調適與適應 … …

甲：「好似明多DD ！  哦 ～ 自然生態學吖嘛 ～ 我識，呢個我梗係識㗎啦！！ 」

乙反問甲道：「乜你咁多野唔問，無端白事中間離問個雞先定蛋先，其實兩個都唔係，係一個細胞先，乜野都應該由第一個完整嘅細胞開始先！！  哈哈 ～ 之不過條問題又真係設計到令人走唔到出去㗎喎！  哈 — 哈哈 ！！ 個作者都真係幾鬼古惑，真真真係幾鬼古惑！ ！  哈！」

乙望住甲：「喂，好D無？  行得未呀 ～  D人走晒嘞！ 」

甲想行，之不過，又反轉輪到乙企咗係度：「唔 … … 又唔係喎！ 雞明明係雀離㗎嘛，但係雀一般都係唔會生D唔受精嘅蛋出離㗎喎，只因每隻蛋內含嘅營養素其實都好鬼高，所以每隻蛋嘅成本其實都好鬼高，正常一般離講D雀仔係唔會咁嘥野㗎，平時佢地產卵通常都只係得果幾隻仔，點解惟獨是雞又會係咁多產㗎呢？！ 」

乙眨眨眼繼續道：「哈！ 雞反而比較似魚，魚係會一次過排出大量嘅卵，但係佢地有機會成功受精嘅機會唔會高，超級浪費，整體成本亦超高，但係，佢地生係水中，魚媽媽都係惟有等D卵係大自然界中「聽天由命」，再行俾佢地一個最衷心嘅祝福咁就算㗎嘞！ 唔係咁，可以點呀？！ 」  乙繼續眼仔碌碌的：「嗯 … …  但係講下講下又奇怪喎！！ 雀仔全部都係紅肉離㗎嘛，又點解惟獨是雞係白肉離㗎呢？！  噫 ～  話時話嘞，其實雞係未真係雀離㗎？！ 」，就在此刻，乙的眼角頓時閃出了一道耀眼的光芒：「哦 — 唔係喎，諗諗下，又啱噃，雞生咁多蛋，係寄居者嘅角度出發，又真係有呢個功能存在嘅獨特需要同價值㗎噃！！  交租吖嘛！ 都係一個適者生存離啫，互惠互利咁，有來有往咁，大家都好未幾好囉！！  呵 — 呵呵 ～ 」

甲線著眼望住乙，心諗：「因乜解究佢今日咁多野講嘅？！  開籠雀咁噃你 … …   為免佢繼續再噴口水，都係行快D跟返條隊穩陣！！ 」

結果，甲一支箭咁拋離乙，向前大叫：「喂 ～  等埋呀！ 後面重有人㗎！！！ 」

前面班人回頭：「嘩 ——  你2個有無咁慢呀？！  行快D啦 ～ 」

乙笑笑，也急步的一同跟了上去 … …

– 版權專有，翻者必究 –